घण्टेश्वर अनलाईन
ड्यालस, टेक्सास
लुम्बिनी सेवा समाज अमेरिकाद्वारा आईतबार आयोजना गरिएको मैत्रीपूर्ण भलिवल प्रतियोगिताको उपाधी नेपाली समाज टेक्ससले जितेको छ । यस बर्षको बडा दशैंको अवसरमा ड्यालसको युलेशमा आयोजना गरिएको उक्त प्रतियोगितामा बिभिन्न ४ वटा टीमको सहभागिता रहेकोमा लिगको आधारमा नेपाली समाज टेक्सासको टीम प्रथम भएको हो ।
यसै गरि उक्त प्रतियोगितामा ब्लड डोनर्स अफ अमेरिका दोश्रो भएको थियो । बिजयी खेलाडी टीमलाई नेपाली समाज टेक्सासका अध्यक्ष राजेन्द्र वाग्ले र लुम्बिनी सेवा समाज अमेरिकाका अध्यक्ष जगदिशप्रसाद न्यौपानेले प्रमाणपत्र, ट्रफी तथा मेडल बितरण गर्नु भएको थियो ।
कार्यक्रममा बोल्दै नेपाली समाज टेक्सासका अध्यक्ष राजेन्द्र वाग्लेले टेक्सासको ड्यालस फोर्टवर्थ क्षेत्रमा नेपाली समुदायको बसोवास बढ्दै गएको सन्दर्भमा नेपाली युवाहरुलाई खेलकुद तर्फ आकर्षित गराउनु पर्ने कुरामा जोड दिनु भयो । यसैगरि आयोजक संस्था लुम्बिनी सेवा समाज अमेरिकाका अध्यक्ष जगदिशप्रसाद न्यौपानेले आपसी सद्भाव, भातृत्वको बिकास गर्दै नेपाली युवाहरुलाई खेलकुद प्रति आकर्षत गराउन समाजले हरेक बर्ष भलिवल प्रतियोगिता आयोजना गर्दै आएको बताउनु भयो ।
प्रतियोगितामा नेपाली समाज टेक्सास, ब्लड डोनर्स अफ अमेरिका, लुम्बिनी सेवा समाज अमेरिका र एभरेष्ट फेड्रल क्रेडिट युनियन गरि ४ वटा खेलाडी समूहको सहभागिता रहेको थियो । उक्त अवसरमा सहभागि खेलाडीहरुले बडा दशैंको अबवसरमा शुभकामना आदान प्रदान समेत गरेका थिए ।