घण्टेश्वर अनलाईन
ड्यालस टेक्सस
गैरआवासीय नेपाली संघ (एनआरएनए) राष्ट्रिय समन्वय परिषद् अन्तर्गत टेक्सास च्याप्टरको अध्यक्ष पदको लागि सम्पन्न निर्वाचनमा निलेश श्रेष्ठ विजयी भएका छन्।
जुलाई २७ र २८ गते सम्पन्न भएको निर्वाचनमा श्रेष्ठले ७८५ मत प्राप्त गर्दै विजयी भएका हुन्। उनका प्रतिद्वन्द्वी गोविन्द गौतमले ६२१ मत प्राप्त गरेका थिए भने अर्का उम्मेदवार ईश्वर ढकालले ७२ मत पाएका थिए। यसैगरी, “कसैलाई पनि मतदान गर्दिन“ भन्ने मतदाताको संख्या १८ रहेको निर्वाचन समितिले जनाएको छ।
यसअघि टेक्सास च्याप्टरका अध्यक्ष बाहेक अन्य सबै पदमा उम्मेदवारहरू निर्विरोध निर्वाचित भइसकेका थिए । अध्यक्ष पदमा भने कडा प्रतिस्पर्धा भएको थियो ।
निर्वाचनपश्चात नव–निर्वाचित अध्यक्ष निलेश श्रेष्ठले गैरआवासीय नेपाली संघ टेक्सास च्याप्टरलाई गैरआवासीय नेपालीहरूको आकर्षणको केन्द्र बनाउने प्रतिबद्धता जनाए। उनले भने, “च्याप्टरका निश्चित काम, कर्तव्य र अधिकारहरू छन्। तर, हामी मतदातालाई मात्र निर्वाचनको समयमा भेट्ने प्रवृत्तिको अन्त्य गर्न चाहन्छौं। आम गैरआवासीय नेपालीहरूबीचको सम्बन्ध विस्तार गर्दै, टेक्सासवासी नेपालीहरूसम्म पुग्ने हाम्रो उद्देश्य छ।”
“अहिले गैरआवासीय नेपाली संघ ड्यालस–फोर्टवर्थ क्षेत्र बाहिर सक्रिय छैन भन्ने आलोचना रहेको छ। त्यसलाई तोड्दै, सम्पूर्ण टेक्सासका प्रमुख स्थानहरूमा कार्यक्रमहरू पु¥याउने, नेपाली समुदायका विभिन्न संस्थाहरूसँग समन्वय गरी ‘नेपालीका लागि नेपाली’ भन्ने अभियानलाई विस्तार गर्ने हाम्रो योजना छ,” श्रेष्ठले बताए।
अध्यक्ष श्रेष्ठले च्याप्टरको निर्बाचनलाई सौहार्द रुपमा सम्पन्न गर्न सहयोग गर्ने निर्बाचन आयोग, आम मतदाता, सरोकारवाला सबैलाई धन्यवाद दिएका छन् ।
यसैगरी, गैरआवासीय नेपाली संघ अमेरिकाको च्याप्टर अन्तर्गत टेक्सास बाहेक कोलोराडो र पेन्सिलभेनिया राज्यका च्याप्टरहरूमा पनि अध्यक्ष तथा सचिव पदका लागि निर्वाचन सम्पन्न भएको छ।
कोलोराडो च्याप्टरको अध्यक्ष पदमा चन्द्र प्रकाश गुरुङ १ सय ४५ मत प्राप्त गरी विजयी भएका छन्। उनका प्रतिस्पर्धी दिनेशकुमार श्रेष्ठले ७३ मत प्राप्त गरेका थिए। त्यस्तै, सचिव पदमा भुवन सापकोटा १ सय ४९ मतसहित विजयी बनेका छन् भने उनका प्रतिस्पर्धी अर्जुनकुमार कार्कीले ६९ मत प्राप्त गरेका थिए। निर्वाचन आयोगले सार्वजनिक गरेको विवरणअनुसार उक्त मतपरिणाम प्राप्त भएको हो।
यस्तै, पेन्सिलभेनिया च्याप्टरको अध्यक्ष पदमा नविन लामा १ सय ४८ मत प्राप्त गरी विजयी भएका छन्। उनका निकटतम प्रतिस्पर्धी प्रकाश भाईले १ सय ४२ मत प्राप्त गरेका थिए।
निर्वाचन सम्पन्न भएपछि सोमबार निर्वाचन आयोगले टेक्ससको ड्यालसमा एक औपचारिक कार्यक्रम आयोजना गरी राष्ट्रिय समन्वय परिषद् तथा टेक्सास च्याप्टरका नवनिर्वाचित पदाधिकारीहरूलाई पद तथा गोपनीयताको शपथ ग्रहण गराएको छ।
