घण्टेश्वर अनलाइन
ड्यालस, टेक्सस,
नेपाली महिलाहरूको महान् चाड हरितालिका तीज यस वर्ष भदौ १० गते अर्थात् अगस्ट २६ मा परेको छ । तर टेक्ससको ड्यालसमा रहेका नेपाली समुदायमा भने तीजको चटारो सुरु भइसकेको छ ।
टेक्ससमा क्रियाशील विभिन्न जातीय तथा क्षेत्रीय संस्थाहरूले तीज मनाउने तयारी थालेका छन् । सामाजिक सञ्जालहरूमा तीज तथा दरखाने कार्यक्रमका ब्यानर सार्वजनिक भइरहेको छ ।
यसैक्रममा लुम्बिनी सेवा समाज, अमेरिकाले यही अगस्ट १७ (आईतबार) का दिन तीज विशेष कार्यक्रम आयोजना गर्ने भएको छ । अर्भिङस्थित भेटघाट रेस्टुरेन्टमा हुने सो कार्यक्रम दिउँसो २ बजेदेखि राति १० बजेसम्म सञ्चालन हुनेछ ।
समाजकी महिला संयोजक राधिका खरालका अनुसार कार्यक्रममा संयुक्त दरखानेसहित मौलिक नेपाली लोकधुनमा आधारित तीज गीत र सांस्कृतिक प्रस्तुतीहरू रहनेछन् । उनले लुम्बिनी प्रदेशको मौलिकता झल्किने तीज गीत तथा नृत्य प्रस्तुत गरिने जानकारी दिइन्।
कार्यक्रममा सहभागी हुन १० वर्षभन्दा माथिका व्यक्तिका लागि ३० डलर प्रवेश शुल्क तोकिएको छ । लुम्बिनी सेवा समाजले हरेक बर्ष मौलिकता र सांस्कृतिक विविधता झल्किने तीज कार्यक्रम आयोजना गर्दै आएको छ ।
समाजले सम्पूर्ण नेपाली समुदायलाई कार्यक्रममा उपस्थित भई तीजको सांगीतिक र सांस्कृतिक उत्सवमा सहभागी हुन आग्रह गरेको छ ।
