घण्टेश्वर अनलाईन
ड्यालस टेक्सस
टेक्सासको ड्यालस स्थित पशुपतिनाथ तथा बौद्ध बिहार मन्दिरमा जारी महाशिबरात्री उत्सब कार्यक्रममा बालबालिकाका बिचमा नेपाली भजन गायन प्रतियोगिता आयोजना गरिएको छ । अमेरिकामा जन्मेका र हुर्केका दोश्रो पुस्तालाई नेपाली भाषा तथा संस्कृति पुस्तान्तरण गर्ने उद्देश्यले नेपाली भजन गायन प्रतियोगिता आयोजना गरिएको हो ।
नेपाली समाज टेक्सस, ग्लोबल नेपाली पाठशालामा अध्ययनरत २० जना बालबालिका सहभागि भएको उक्त प्रतियोगितामा आर्या खनाल प्रथम, आध्या अधिकारी दोश्रो र रायन क्षेत्री तेश्रो भएको बिद्यालयका प्रिन्सिपल डा. भोजबहादुर बलायरले जानकारी दिनु भयो ।
नेपाली साँस्कृतिक तथा अध्यात्मिक केन्द्र युलेशको सभाकक्षमा आयोजना गरिएको उक्त प्रतियोगितामा सहभागि बिद्यार्थीहरुले बिभिन्न भजन प्रस्तुत गरेका थिए । नेपाली भजन गायन प्रतियोगितामा उत्कृष्ट बिजयी बालबालिकाहरुलाई नेपाली समाज टेक्ससका अध्यक्ष राजेन्द्र वाग्लेले पुरस्कार बितरण गर्नु भएको थियो ।
युलेश स्थित पशुपतिनाथ तथा बौद्ध मन्दिरमा गत आईतबार देखि जारी महाशिबरात्री उत्सब बुधबार समापन हुने नेपाली साँस्कृतिक तथा अध्यात्मिक केन्द्रले जनाएको छ ।
