जोरायलमा अध्यक्ष पदको लागि नेपाली काँग्रेसका ७ जनाको दावी

 घण्टेश्वर अनलाईन
जोरायल
जोरायल गाउँपालिकाको अध्यक्ष पदको उम्मेदवार बन्न आकाँक्षी धेरै भएपछि नेपाली काँग्रेस जोरायल गाउँपालिका समितिले जिल्ला कार्य समितिलाई सिफारिस गरेको छ ।
नेपाली काँग्रेसको जोरायल गाउँपालिकाको लागि अध्यक्ष पदमा उम्मेदवार बन्न अरुणकुमार जोशी, दीपकबहादुर बिष्ट, लिलाधर जोशी, मोहन कलेल, सोपान बोहरा, भजनसिंह मल्ल र भक्तबहादुर अधिकारी गरि ७ जनाले दावी पेश गरेका छन ।
स्थानीय स्तरमा सहमतिको प्रयास असफल भएपछि गाउँपालिका अध्यक्षको टुँगो लगाउन जिल्ला कार्य समितिलाई सिफारिस गरिएको गाउँ पालिका कार्य समितिका सभापति मोहनबहादुर मल्लले जानकारी दिनु भयो । दावी पेश गर्ने सबैजना आकाँक्षीहरुले वडा समितिबाट सिफारिस गराएका थिए ।
को हुन गाउँ पालिका अध्यक्षका आकाँक्षीहरु
अरुणकुमार जोशी : जोरायल गाउँ पालिका वडा नंं ३ निवासी अरुणकुमार जोशी पेशाले ईन्जिनियर हुन । उनले डोटी जिल्लाका सरकारी तथा गैरसरकारी निकायमा पनि काम गरेको अनुभव छ । बिद्यार्थीकाल देखि नेपाल बिद्यार्थी सँघमा आबद्ध भएर काम गरेका जोशी युवाहरु बिचमा लोकप्रिय छन ।
दीपकबहादुर बिष्ट : जोरायल गाउँ पालिका वडा नंं ५ निवासी दीपकबहादुर बिष्ट नेपाली काँग्रेसका पुराना नेता हुन । २०५४ सालको स्थानीय तहको निर्बाचनमा झिनो मतले जिल्ला बिकास समितिको उप सभापति पदमा पराजित भएका थिए ।  बिष्ट बि.सं २०७४ को स्थानीय तहको निर्बाचनमा जोरायल गाउँ पालिकाको अध्यक्ष पदमा पराजित भएका थिए ।
लिलाधर जोशी : जोरायल गाउँपालिका वडा नंं ६ निवासी लिलाधर जोशी नेपाली काँग्रेसका युवा नेता हुन । जोशी बि.सं. २०७४ सालको स्थानीय तहको निर्बाचनमा जोरायल गाउँ पालिका वडा नंं ६ को वडाअध्यक्ष पदमा पराजित भएका थिए । जोशी युवाहरुका बिचमा लोकप्रिय मानिन्छन ।
मोहन कलेल : जोरायल गाउँ पालिका वडा नंं ४ निवासी कलेल डोटी उद्योग बाणिज्य सँघका अध्यक्ष पनि हुन । उनि लामो समय देखि नेपाली काँग्रेसमा आबद्ध छन ।
सोपान बोहरा : जोरायल गाउँपालिका वडा नं. ५ निवासी सोपान बोहरा नेपाल बिद्यार्थी सँघ डोटीका पूर्ब अध्यक्ष पनि हुन । उनि लामो समय देखि नेपाली काँग्रेसमा कृयाशिल रहेका छन ।
भजनसिंह मल्ल : जोरायल गाउँपालिका वडा नंं १ निवासी भजनसिंह मल्ल वडा नं. १ का वडा अध्यक्ष पनि हुन । उनि नेता कार्यकर्ता तथा जनताका बिचमा लोकप्रिय मानिन्छन । मल्ल नेपाली काँग्रेस जोरायलका परिपक्व नेताका रुपमा   चिनिन्छन ।
भक्तबहादुर अधिकारी : जोरायल गाउँपालिका वडा नंं ४ निवासी अधिकारी नेपाली काँग्रेसका पुराना नेता हुन । उनी लामो समय देखि नेपाली काँग्रेसमा आबद्ध भएर राजनीति तथा सामाजिक सेवामा सकृय छन ।