गठबन्धन बिरुद्ध डोटी काँग्रेसका नेता कार्यकर्ताको असन्तुष्टि कायमै

घण्टेश्वर अनलाईन
सिलगढी
निर्बाचन आयोगको घोषित कार्यक्रम अनुसार आज देशभर प्रतिनिधि सभा तथा प्रदेश सभा सदस्यका उम्मेदवारहरुले आ आफ्नो उम्मेदवारीको मनोनयन पत्र दर्ता गर्दैछन । आगामी मँसिर ४ गते हुने निर्बाचनमा एकातिर सत्तारुढ दलको गठबन्धन र अर्का तिर एमाले सहितको अर्को गठबन्धनका बिचमा प्रमुख रुपमा प्रतिष्पर्धा हुने देखिएको छ ।
डोटीको सन्दर्भमा निर्बाचनको लागि मनोनयन पत्र दर्ता गर्ने दिन सम्म प्रमुख दलहरुले उम्मेदवारहरुको टुँगो लगाएका छन । सत्ता गठबन्धनको तर्फबाट डोटीबाट प्रतिनिधि सभा सदस्य पदमा एकिकृत समाजवादीका प्रेमबहादुर आलेमगर, डोटी प्रदेश क बाट नेपाली काँग्रेसका नरेन्द्रबहादुर सिंह र प्रदेश ख बाट नेकपा(माओवादी केन्द्र) का शिबसिंह ओलीले आज उम्मेदवारीको लागि मनोनयन पत्र दर्ता गर्दै छन ।
यसै गरि डोटी जिल्लामा नेकपा एमालेले एकल रुपमा निर्बाचन लड्ने भएको छ । एमालेको तर्फबाट प्रतिनिधि सभा सदस्य पदमा गौरी ओली, प्रदेश क मा चक्र मल्ल र प्रदेश ख मा टेकबहादुर बमले उम्मेदवारी दर्ता गर्ने एमाले डोटीले जनाएको छ ।सत्ता गठबन्धन बिरुद्ध डोटीमा असन्तुष्टि कायमै
सत्ता गठबन्धन बिरुद्ध डोटी काँग्रेसका नेता कार्यकर्ताको असन्तुष्टि कायमै देखिएको छ । असन्तुष्ट पक्षले आज स्वतन्त्र रुपमा उम्मेदवारीको मनोनयन पत्र दर्ता गराउने तयारी गरिरहेको बुझिएको छ ।
यो समाचार तयार गर्दासम्म डोटी काँग्रेसका असन्तुष्ट समूहबाट प्रतिनिधि सभा सदस्य पदमा पदमराज जोशी, प्रदेश क बाट जीतबहादुर खड्का र नरेन्द्रबहादुुर खड्का, प्रदेश ख बाट भूमिराज बडुले उम्मेदवारी दर्ता गराउने गरि तयारी भईरहेको र छलफल जारी रहेको बताईएको छ ।
यस सम्बन्धमा असन्तुष्ट समूहबाट प्रतिनिधि सभाका लागि प्रस्ताबित उम्मेदवार पदमराज जोशीसँग सम्पर्क गर्दा यो रहर नभएर बाध्यता भएको बताउनु भयो । स्वतन्त्र उम्मेदवारी दर्ता गराउने बिषयमा सिँगो डोटी काँग्रेसका नेता कार्यकर्ताको साथ र समर्थन रहेकाले आफुहरुले बिजयी हासिल गर्ने दावी गर्नु भयो ।
्