घण्टेश्वर अनलाईन
जोरायल
आफ्नो छोराको जन्म दिनको अवसर पारेर डोटी जोरायलका एक जोशी परिवारले दुईवटा अक्षय कोष स्थापना गरेका छन ।
जोरायल गाउँ पालिका वडा नं. ३ बरम निवासी शिक्षाप्रेमी ७० बर्षिय ईश्वरीदत्त जोशीले आफ्ना छोरा केशब जोशीको ३३ औं जन्म दिनको अवसर पारेर स्थानीय शिबपुर माबि चनकट्टे र प्राथमिक स्वास्थ्य केन्द्र, चनकट्टेमा छुट्टाछुट्टै अक्षय कोष स्थापना गरेका हुन ।
शिबपुर माबि चनकट्टेमा स्थापना गरिएको “ईश्वरी गणेश पशुपति विद्यालय हित अक्षयकोष” को राशी १ लाख ५ हजार रहेको छ भने प्राथमिक स्वास्थ्य केन्द्र चनकट्टेमा स्थापना गरिएको “ईश्वरी गणेश पशुपति स्वास्थ्य कल्याणकारी अक्षय कोष” को राशी पनि १ लाख ५ हजार रहेको छ ।
जोशी परिवारलाई दुबै संस्थाले सोमबार छुट्टाछुट्टै कार्यक्रमको आयोजना गरि सम्मान समेत गरेका छन । शिबपुर माबि चनकट्टेमा आयोजना गरिएको सम्मान कार्यक्रममा बोल्दै जोशीले आफु र आफ्नो जेठो छोरो केशव जोशीले अध्ययन गरेको बिद्यालयमा अक्षय कोष स्थापना गर्न पाउँदा खुशी लागेको बताउनु भयो । सोही कार्यक्रममा जोशीले अक्षय कोषको लागि घोषणा गरेको रकम रु १ लाख ५ हजार बिद्यालयलाई हस्तान्तरण गर्नु भएको थियो ।
यसैगरि जोशीकी श्रीमति पशुपतिदेबी जोशीले महिला स्वास्थ्य स्वयंसेविकाको रुपमा करिब ३० बर्ष सेवा गर्नु भएको थियो । आफुले ३० बर्ष महिला स्वास्थ्य स्वयंसेविकाको रुपमा काम गर्दा स्वास्थ्य क्षेत्रका समस्याहरु देखेको भोगेकाले आँशिक भएपनि राहात पुगोस भनेर प्राथमिक स्वास्थ्य केन्द्रमा अक्षय कोष स्थापना गरेको बताईन । सम्मान कार्यक्रममा जोरायल गाउँ पालिकाका उपाध्यक्ष जमूना बोहरा, वडा नं. ३ का वडा अध्यक्ष नविन ओझा, बिद्यालय निरिक्षक तेजबहादुर खत्री लगायतका बक्ताहरुले बोल्नु भएको थियो ।
यसअघि जोशीले गत बर्ष जोरायल गाउँपालिका – ४ बिनोडा स्थित बेताल आधारभूत विद्यालयमा आफ्ना स्वर्गिय बुवा धनन्जय जोशी र आमा अम्बादेवी जोशीको नाममा रु एक लाख पच्चीस हजार रकमको विद्यालय हित अक्षय कोषको स्थापना गरेका थिए ।
